【娛樂熱話】《香港婚後事》｜羅子溢揭開姊弟戀因由！

由陳自瑤（YoYo）、賴慰玲（Winki）、黎諾懿及羅天宇主持的《香港婚後事》於今晚首播，首集嘉賓則是《婚後事》男主角羅子溢。

羅子溢夫妻免爭拗絕招
因拍劇而變成好友的五人，對談期間暢所欲言。甫開始，黎諾懿即單刀直入，叫子溢解構姊弟戀背後因由，子溢亦大方分享：「當時我覺得需要一個成熟嘅女人喺身邊，可以令自己成長得快啲，同埋到安全感。」
他直認偶爾會與太太楊茜堯冷戰，還分享了二人處理爭拗的手法，子溢笑言每次冷戰首先讓步的必定是自己。「我以前會拗，依家屋企所有濕碎嘢我係唔會理，總之你決定就啱。」至於太太的處理方法則是瞓醒先算，「我太太一遇到問題，會話唔好講住，等瞓醒先（處理）。」子溢又分享了相當獨特的湊女心得，並謂希望女兒長大後，能成為硬淨的人。

子溢笑言叫 Yoyo 要放低張明芯這個角色。

Yoyo 連環以尖銳情境題向諾懿逼供，令諾懿一度陷入苦思。

陳自瑤企硬不接受出軌
五人討論得最熱熾的話題是「肉體出軌」VS「精神出軌」。 Yoyo 一聽到諾懿題目，即斬釘截鐵謂：「兩樣都唔得！」諾懿即反駁：「諗吓咋喎。」Yoyo 聞言即一臉認真，向諾懿拋出兩條相當尖銳的情境題，分別為「如果你老婆同你一齊，佢不停諗緊第二個男人，你接唔接受到吖？」及「如果你老婆出完軌一次返番嚟你度，你接唔接受到？」令諾懿陷入苦思，坦言確有一個狀況難以接受。之後 Yoyo 再追著諾懿問：「如果佢鍾意咗另一個，佢之後返嚟屋企，但個心都係飄走咗，咁又得唔得？」此時子溢即衝出來企圖以一句解圍，不過卻引起阿賴勁大反應：「呢個好殘忍！」到底子溢說了甚麼？阿賴之後坦言很怕有一天會認同子溢等人的看法，到底她為何講到如此嚴重？

無論肉體出軌定精神出軌，Yoyo 一律不接受。

緋聞大逼供玩謝羅天宇
除了 talk 得，子溢還相當玩得，他的出招對象當然是最怕醜又內向的天宇。事緣子溢一到場即追問天宇緋聞，嚇到天宇即時眼都凸埋，Yoyo 在旁食晒花生笑說：「你好大膽。」諾懿則佻皮謂：「嘉賓講嘢可以唔負責任呀。」之後全場起哄笑個不停，五人進行了長達數分鐘的「廝片」，天宇全程怕醜仔上身，面都紅晒，場面爆笑。
除了天宇，Yoyo 及諾懿亦是被玩對象，前者不斷遭子溢苦勸：「過去咗喇，唔好再執著個角色喇！」後者則不停遭阿賴搞笑攻擊：「全公司都知你最有錢！」場面搞笑！

子溢捉住天宇追問緋聞嘢，嚇到天宇眼都凸。